Son dəqiqə
- 23 Mart 2025
Ötən gün İrəvanda müxalifətin çoxspektrli mənzərəsini təmsil edən qüvvələri bir araya gələrək “Paşinyan hakimiyyətdən dəf ol”, “İqtidar Qarabağı təslim etmək istəyir”, “Hökumət mövcud problemlərin öhdəsindən gələ biımədiyi üçün istefa versin” və sair şüarlarla küçələrə çıxmışdı. Faktiki olaraq İrəvandakı KİV-lər də dolayı yolla müxalifətin ideyalarını geniş miqyasda təbliğ etməklə məşğuldur. “Stabil bölgə” adı altında Qərb dövlətlərindən neçə ildir irihəcmli qrant layihələri alaraq demokratik dövlət modelini sərgiləyən Ermənistanda nə baş verir? Mövcud iqtidarın yekcins olmadığı qənaəti demək olar ki, hər addımda açıq şəkildə söylənilir.
Globall.az-ın bu və digər suallarını CXP (Cümhuriyyət Xalq Partiyası) sədri Bədrəddin Quliyev cavablandırır.
– Bədrəddin bəy, Ermənistana nə oldu ki, birdən-birə hakimiyyətdaxili münaqişələr, eləcə də müxalifətin iqtidara qarşı sərt təpkiləri alovlanmağa başlayıb?..
– Onu deyə bilərik ki, son zamanlarda Ermənistan hökumətinin COVİD-19 koronavirus pandemiyasına qarşı mübarizədə vətəndaşlarının səhiyyə və sosial problemlərini həll edə bilməməsi ictimai rəydə baş nazir Nikol Paşinyana qarşı narazılıq yaratdığı kimi, müxalifət cəbhəsindən də ciddi ittihamlar var.
Maraqlı odur ki, bu ittihamlar siyasi müstəvidə və pandemiyaya qarşı mübarizədə hökumətin gördüyü tədbirlərin yetərsiz olması ilə bərabər, daha çox Paşinyanın şəxsinə yönəlikdir.
Belə ki, sabiq prezidenti Serj Sarqsyanın kürəkəni, Ermənistanın Vatikandakı sabiq səfiri Mikael Minasyan baş nazir Paşinyanın siqaret, brilyant qaçaqmalçılığı və silah alveri ilə məşğul olduğunu bildirib.
Sabiq səfirin hökumətə qarşı münasibətinin kəskinləşməsində əsas amil Serj Sarqsyanın kürəkəni olmasına görə hökumətin ona qarşı qanunsuz gəlir əldə etmə ittihamı ilə cinayət işi başlaması, məhkəmə tərəfindən haqqında həbs qətimkan tədbiri qərarının alınması və atası, “Müqəddəs Qriqori” Tibb Mərkəzinin baş həkimi Ara Minasyanın işdən çıxarılması olmuşdur.
O da bəllidir ki, Sarqsyanın lideri olduğu Respublika Partiyası (RP) Paşinyana qarşı son zamanlarda təzyiqlərini artırır və Mikael Minasyan RP-nin Avropadakı ruporu kimi çıxış edir.
Heç kimə sirr deyil ki, Ermənistanda siqaret qaçaqmalçılığı hökumətə yaxın olan bir qrupun, konkret Paşinyanın qardaşı oğlu, qaynı və Dövlət Gəlirləri Komitəsinin sədr müavini tərəfindən idarə edilir. Paşinyan şəxsi düşmənçilik zəminində sabiq prezident Serj Sarqsyan və ətrafina siyasi və inzibati təzyiqləri gücləndirir. Təbii ki, qarşı tərəf də buna müxtəlif iddialarla cavab verir.
– Müxalifət baş nazir Paşinyanı populist çıxışlar etməklə mövcud problemlərdən bir qədər yayınmaq taktikasını da gündəmə gətirib. Hətta iddia olunur ki, mövcud social-iqtisadi durum beş il öncəkindən daha ağırdır. Ötən müddətdə irəliyə doğru heç bir addım atılmayıb...
– Əvvəla onu deyə bilərik ki, Minasyan Paşinyan iqtidarının sonunun yaxınlaşdığını, onun populist çıxışlarla ölkəni idarə edə bilmədiyini və bu səbəblə də beynəlxalq mafiya ilə əməkdaşlıq edərək qısa zamanda qaçaqmalçılıq yolu ilə şəxsi sərvətini artırmağa çalışdığını qeyd edib.
Cari ilin may ayının ortalarında Rusiyanın Voronej şəhərində Ermənistandan qaçaqmalçılıq yolu ilə gətirilən külli miqdarda siqaret müsadirə edilib. Rusiya mətbuatı məsələ ilə bağlı konkret şəxslərin adını çəkməsə də, Minasyan müsadirə edilən siqaretlərin Paşinyanın qardaşı oğlu Sipan Paşinyana aid olduğunu bildirir.
O da bəllidir ki, Sipan Paşinyan “Mənim Addımım” blokundan millət vəkili seçilib. Minasyan qeyd edir ki, siqaretlərin son ixrac nöqtəsi Əfqanıstan kimi göstərilsə də, rəsmilər malın Voronej şəhərində necə ələ keçdiyini və müsadirə edildiyini izah edə bilmirlər. Siqaret qaçaqmalçılığı ilə bağlı Sipan Paşinyana, Nikol Paşinyanın arvadı Annanın rəfiqəsi, Dövlət Gəlirləri Komitəsinin sədr müavini Şuşan Nersisyan və Paşinyanın qayını, “Mənim Addımım” blokundan deputat seçilmiş Hraçya Akopyan köməklik ediblər.
Minasyan onu da qeyd edir ki, Voronejdə müsadirə edilən siqaretlərlə bağlı cinayət işinin açılmaması üçün Paşinyan müşaviri general Arşak Karapetyanı təcili olaraq Rusiyaya göndərib və müzakirələr aparılıb.
Minasyan Karapetyanın avtobioqrafiyası ilə bağlı məlumat verərək onu karyerasında “vurulmuş kadr” kimi təqdim edir. Minasyana görə siqaret qaçaqmalçılığı ilə bağlı problemi həll etmək üçün Paşinyan müşaviri general Arşak Karapetyanı təcili olaraq Voronejə ezam edib.
Pandemiya ilə əlaqədar hər iki ölkədə karantin rejimi olduğu üçün Arşak Karapetyanın sadə vətəndaş kimliyi ilə ölkəni tərk etməsinin mümkün olmadığı və Karapetyanın rəsmi kimliyi ilə ölkəni tərk etdiyini deyən Minasyan, Karapetyanın Rusiyaya səfəri haqqında hökumətin internet səhifəsində heç bir məlumat verilmədiyini bildirib.
– Belə bir versiya da var ki, müxalifət bir sıra bəhanələr gündəmə gətirərək əslində Paşinyan iqtidarının mafiya qanunları ilə idarə olunduğu iddiasını önə sürməklə həm də Qərbin dayaq rolunu azaltmağa çalışır.
– Ona görə də Minasyan Paşinyanı ictimai rəydə mənfi obrazını formalaşdırmaq üçün general Karapetyanın kim olduğu haqqında məlumat verir. General Karapetyan 2016-cı il aprel ayında baş verən dörd günlük müharibə zamanı Ermənistan ordusunun Kəşfiyyat İdarəsinin rəhbəri olub və bu hadisədən sonra kəşfiyyatçı kimi hadisə barəsində əvvəlcədən lazımı informasiya təmin edə bilmədiyi və yararsız olması ilə ittiham edilərək vəzifəsindən uzaqlaşdırılıb.
Minasyan iddia edir ki, Paşinyan iqtidara gəldiyində vaxtilə “vurulmuş” general və siyasətçiləri ətrafına toplayaraq özünə sadiq bir komanda formalaşdırmağa çalışır. Bu iddiaların sabiq səfir tərəfindən dilə gətirilməsi və müxtəlif arqumentlərlə dəstəkləməsi heç şübhəsiz Paşinyanı narahat edir.
– Bəs Mİnasyan bütün bunları hansı arqumentlə əsaslandırır?
– O, cari ilin 31 may tarixində yayımladığı video müraciətdə sırf dövlətin təhlükəsizlik məsələləri ilə bağlı olduğu üçün detallarına toxunmadan Nikol Paşinyanın tütün, brilyant və beynəlxalq silah qaçaqmalçılığı ilə bağlı məlumat verib. Bu, kifayət qədər ciddi bir iddiadır. Bu cinayət artıq ölkə sərhədlərini aşır və beynəlxalq təhlükəsizlik problemidir.
Minasyanın qeydlərinə görə, silah alverində mexanizm belə qurulub: Paşinyan Müdafiə nazirliyi vasitəsilə David Qalstyana Ermənistanın adına silah alma səlahiyyətləri verib. O da bəllidir ki, Ermənistan Rusiyadan daxili bazar qiymətinə silah alma haqqına sahibdir. Bundan istifadə edən Paşinyanın adamı Qalstyan şərti olaraq 100 ədəd silah alınması üçün Rusiya ilə müqavilə imzalayır.
Daha sonra ofşor zonadan ödənən pulla Qalstyanın aldığı silahlardan 60 ədədi Ermənistana gətirilir. Geri qalan 40 ədəd silah isə Rusiyadan üçüncü ölkəyə, oradan da dördüncü ölkəyə satılır.
Bu silahlar istifadə edildiyində, əlbəttə, harada və hansı dövlət tərəfindən istehsal edildiyi, hansı dövlətə satıldığı haqda məlumatlar bazadan öyrənilir. Rusiya Paşinyan-Qalstyan cütlüyünün bu əməliyyatından xəbər tutan kimi Qalstyanı ölkəsində “arzu edilməyən şəxs” elan edir və 10 il Rusiyaya girişinə yasaq qoyub.
Paşinyanın silah qaçaqmalçılığı inventarında adi silahların deyil, zenit-raket komplekslərinin də olduğu haqqında ciddi iddialar var. Ümumiyyətlə müxalifət cinahından Paşinyana qarşı təzyiqlər artır və bu onu ciddi yanlışlıqlar etməyə sövq edir.
Minasyanın iddiaları və ittihamları ilə bağlı hələlik hökumətdən rəsmi açıqlama verilməyib. Bu da erməni ictimai rəyində Paşinyanın mövqeyinin zəifləməsinə səbəb ola bilər. Xüsusilə pandemiya dövründə hökumətin aldığı tədbirlərin yetərsiz olduğu, yoluxmaların sayının həndəsi silsilə üzrə artdığı, paralel olaraq insanların hökumətə etibarının azaldığı bir dövrdə bu, Paşinyan üçün ciddi problemlərdən biridir.
– Sizin fikrinizcə bütün bunlar hansı sonluqla tamamlanacaq?
– Ermənistan adlı ərazidə erməniərin tarixən dövlətləri olmayıb. Ermənilər onlara dəstək verən havadarlarının sayəsində dövlət olma ideyasını 300 ildir təbliğ edirlər. Nəinki Cənubi Qafqaz regionuna, Güney Azərbaycanın və Türkiyənin ərazilərinin yarısını da xəyali “Böyük Ermənistan” ideyasına pərçimləməyə çalışırlar.
Onlara sual vermək gərəkdir ki, xəyallarında tutduqları bu nəhəng ərazidə yaşaya biləcək sayda dünya çapında ermənilərin sayı nə qədərdir?
Ermənilər tarixən kim olursa olsun supergüc dövlətlərin maşası rolundan kənara çıxa bilməyiblər. Özəlliklə ermənilərin 2018-ci ildən sonra, dövlət olma imkanları da addım-addım itirilməkdədir. Durumun belə bir həddə çatmasından rahatsız olan “hərbi xunta” rejimi tərəfdarları ölkəni vətəndaş savaşına sürükləməklə vaxt qazanmağa çalışırlar. “Hərbi xunta” ideyasının tərəfdarlarının fikrincə, erməni cəmiyyətini qorxu və təhdid altında saxlamaqla bəlkə “Ermənistan” dövlətini qorumaq mümkün oldu. Bu gün yaşanılanlar da həmin olayın bir parçasıdır.
Unutmayaq ki, “hərbi xunta” rejimi tərəfdarları Paşinyan iqtidarından daha çox qara bazarda silah, brilyant, narkotika və digər qanunsuz yollarla malların dövriyyəsi ilə məşğul olublar. Bu gün görünən odur ki, “qara bazarda əl dəyişib” və bunu həzm edə bilmirlər. Hər iki cinahı təmsil edənləri heç bir zaman erməni xalqının taleyi ilgiləndirməyib. Xalqı vətəndaş savaşına sürükləməklə hansı gücün önə çıxa biləcəyi mövzusu sadəcə ideoloji baxımdan spekulyasiya olunur.
