Son dəqiqə
- 6 İyun 2025
Ədalət, Hüquq, Demokratiya Partiyasının (ƏHD) sədri, millət vəkili Qüdrət Həsənquliyev Qurban Bayramı münasibətilə Azərbaycan xalqına təbrik ünvanlayıb. Təbrikdə deyilir:
“Əziz həmvətənlər!
Sizi müqəddəs Qurban bayramı münasibətilə təbrik edir, hər birinizə möhkəm cansağlığı, ailələrinizə əmin-amanlıq və ruzi-bərəkət arzulayıram.
Qurban bayramı insanlıq tarixində ən yüksək mənəvi dəyərlərin – fədakarlığın, mərhəmətin, səxavətin və Allaha yaxınlığın təcəssümüdür. Bu bayramda insanlar yalnız bir dini vəzifəni yerinə yetirmir, həm də mənəvi saflaşma və ruhani ucalma mərhələsindən keçir, paylaşmaqla, ehtiyac sahiblərinə əl uzatmaqla kamilliyə doğru addımlayır.
Əsrlər boyu xalqımız bu bayramı dərin ehtiramla qarşılamış, onu sadəcə dini ənənə kimi deyil, həm də ailə bağlarının möhkəmləndiyi, insanın öz vicdanı ilə baş-başa qaldığı, qəlblərin birləşdiyi müstəsna günlər kimi yaşatmışdır. Hər bayramda bir süfrə başında toplanan ailələr, bir-birini sevindirən qonşular, imkansızlara əl tutan insanlar bizim milli kimliyimizin, mənəvi zənginliyimizin ifadəsidir.
Bu bayram həm də bizə xatırladır ki, həyatın dəyəri yalnız maddiyyatda deyil, insani münasibətlərdə, paylaşmaqda, vəfa və sədaqətdədir. Qurbanın fəlsəfəsi yalnız heyvan kəsmək deyil, o, insanın nəfsindən, eqosundan, təkəbbüründən keçərək, daha yüksək dəyərlərə bağlanması deməkdir. Elə buna görə də Qurban bayramı hər il bizə daha saf, daha mərhəmətli və daha məsuliyyətli olmağın zərurətini xatırladır.
Bu mübarək günlərdə biz həm də Vətən yolunda canından keçmiş şəhidlərimizi ehtiramla yad edir, qazilərimizə şəfa, ailələrinə səbir və xoş günlər arzulayırıq. Onların fədakarlığı sayəsində bu torpaqda birliyimizi və mənəvi dəyərlərimizi yaşatmaq imkanı qazanmışıq.
Qoy bu müqəddəs bayram hər evə işıq, hər ocağa sevinc, hər könülə ümid gətirsin. Dualarınız qəbul, niyyətləriniz xeyirli olsun!
Bayramınız mübarək!”
