• 1 Dekabr 2020
logo
Azərbaycanın həyata keçirdiyi bütün enerji layihələri əsrin önəmli layihələridir - Hulusi Kılıç

Azərbaycanın həyata keçirdiyi bütün enerji layihələri əsrin önəmli layihələridir - Hulusi Kılıç

Azərbaycanın həyata keçirdiyi bütün enerji layihələri əsrin önəmli layihələridir.

Bunu Trend-ə özəl açıqlamasında Türk Dünyası Parlamentlər Birliyinin baş koordinatoru, Türkiyənin Azərbaycandakı sabiq səfiri Hulusi Kılıç deyib.

H.Kılıç bildirib ki, Azərbaycanın ümummilli lideri Heydər Əliyevin təşəbbüsü ilə Bakı-Tbilisi-Ceyhan neft kəmərinin məhz Türkiyə üzərindən inşa edilməsi ilə qardaş Azərbaycan nəhəng layihələrə start verdi: “Bunlar Bakı-Tbilisi-Ərzurum qaz kəməri, İpək dəmir yolu xətti adlandırılan Bakı-Tbilisi-Qars dəmir yolu xətti və dördüncü nəhəng layihə olan Trans-Anadolu qaz kəməri - TANAP-dır”.

Diplomat vurğulayıb ki, TANAP, sözün əsl mənasında çox möhtəşəm layihədir və bu layihəyə Türkmənistan və Qazaxıstanın qoşulacağı təqdirdə, bütövlükdə, Türk dünyasının layihəsi halına gələcək.

Qeyd edək ki, noyabrın 30-da Türkiyənin Ədirnə şəhərinin İpsala qəsəbəsində Trans Anadolu Təbii Qaz Boru Kəmərinin (TANAP) Avropa bağlantısının (Faza-1) açılış mərasimi keçirilib.

Xəzərin Azərbaycan sektorundakı "Şahdəniz-2" yatağından çıxarılan qazı Türkiyəyə və bu ölkədən Avropaya nəql edəcək TANAP "Cənub Qaz Dəhlizi"nin tərkib hissəsi olan bir layihədir. TANAP Türkiyə-Gürcüstan sərhədində Cənubi Qafqaz Boru Kəmərinə, Türkiyə-Yunanıstan sərhədində isə "Trans-Adriatik" (TAP) qaz boru kəmərinə birləşəcək. Uzunluğu 1810 kilometr olan TANAP-ın ilkin ötürücülük qabiliyyəti 16 milyard kubmetrdir və sonradan bu həcmin 31 milyard kubmetrədək artırılması imkanı var.

TANAP-ın səhmdarlarının bu layihədə payı belədir: "Cənub Qaz Dəhlizi" QSC - 58 faiz, "Botaş" - 30 faiz və BP şirkəti - 12 faiz.

Xatırladaq ki, TANAP ilə ilk qaz ötürülməsi 2018-ci il iyunun 12-də Türkiyənin Əskişəhər vilayətində baş tutub və həmin il iyun ayının sonuna Türkiyəyə qazın kommersiya tədarükləri başlayıb. 2018-ci il iyunun 30-dan 2019-cu il oktyabrın sonuna TANAP ilə qaz tədarükü 3,08 milyard kubmetr təşkil edib.