Qırğızıstan və Tacikistan sərhəddəki əlavə hərbi qüvvələri geri çəkib

Qırğızıstan və Tacikistan sərhədə cəlb olunan əlavə qoşun qüvvələrini qarşılıqlı olaraq geri çəkib.

APA-nın RİA “Novosti”yə istinadən verdiyi xəbərə görə, bu barədə Qırğızıstanın Sərhəd Xidməti məlumat yayıb.

Məlumatda o da bildirilib ki, hazırda sərhəddə vəziyyət sabitdir, ötən gecə hər hansı insident qeydə alınmayıb: “Qırğızıstan və Tacikistanın yüksək rütbəli zabitlərindən ibarət komissiya sərhəd bölgəsində fəaliyyətini davam etdirir. Əməkdaşlarımız bölgədə sərhəd nəzarətini gücləndirilmiş rejimdə həyata keçirir”.

Qeyd edək ki, aprelin 29-da hər iki tərəfdən sərhədyanı bölgə sakinlərinin münaqişəsi silahlı mübarizə səviyyəsinə çatıb. Hər iki ölkənin sərhədçiləri arasındakı atışma nəticəsində ümumilikdə 50 nəfərə yaxın insan ölüb, 200-dən çoxu isə yaralanıb.

Tərəflər atəşkəs barədə ilkin razılığa gəlsə də, növbəti gün silahlı mübarizə davam edib. Aprelin 30-u axşam saatlarında növbəti atəşkəs əldə olunub.