• 21 Yanvar 2022
logo
Azərbaycanda 3-cü doza vaksini kimlərə vurula bilər?

Azərbaycanda 3-cü doza vaksini kimlərə vurula bilər?

“Azərbaycan Respublikasında “COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq ölkə üzrə peyvəndlənmə prosesi davam edir.
Səhiyyə Nazirliyindən “Xalq Cəbhəsi”nə verilən məlumata görə, son elmi tədqiqatlara əsasən, COVID-19 xəstəliyi əleyhinə hər 2 doza vaksin almış bütün tibb işçilərinin, yaşı 60-dan yuxarı olan əhalinin və immun sistemi zəif şəxslərin 3-cü doza (“buster” doza) ilə peyvəndlənmələri tövsiyə edilir.
Bunun üçün vətəndaşlar https://randevu.its.gov.az/ saytına daxil olaraq, “COVID-19 vaksin randevu” elektron xidmətindən istifadə etməklə koronavirus xəstəliyi əleyhinə vaksinasiya üçün onlayn qaydada növbə götürməlidir.
Qeyd edək ki, “Peyvənd sertifikatı” müddətsizdir və 3-cü dozanın (“buster” doza) vurulması onun müddətinə təsir etmir.
Dünyada və ölkəmizdə aparılan tədqiqatlardan əldə olunmuş nəticələrin təhlili bir daha göstərir ki, virusun yeni və sürətlə yayılan təhlükəli növlərindən qorunmağın ən effektiv yolu vaksinasiyadır. Vaksinasiya ilə yanaşı, fiziki məsafənin saxlanılması, maskalardan istifadə və əl təmizliyi kimi qaydalara riayət olunmalıdır.
Yeri gəlmişkən, Milli Məclisin deputatı Könül Nurullayeva deyib ki, son günlər Azərbaycanda yoluxma və bununla əlaqədar ölüm hallarının artması epidemioloji vəziyyətlə bağlı narahatlıq yaradır. Avqustun 1-də 671 yoluxma və 4 ölüm halı qeydə alınmışdısa, avqustun 21-i bu rəqəm 3551-ə, ölüm sayı isə 27 -ə çatdı. Bu o deməkdir ki, 20 gün ərzində yoluxma 5 dəfədən artıq, ölüm halı 7 dəfəyə yaxın artıb. Eyni tendensiya qonşu ölkələrdə də müşahidə olunmaqdadır. Tətil mövsümündə bu artım Azərbaycana da mənfi təsir göstərir.
O qeyd edib ki, mütəxəssislər bu təhlükəli artım dinamikasını karantin rejiminin yumşaldılması ilə izah edir: “Bir çox məhdudiyyətlərin aradan qaldırılması, açıq havada maska rejiminin ləğvi, restoran və ticarət obyektlərinin, metronun açılışı, şənlik mərasimlərinə icazə verilməsi yoluxmada mənfi tendensiyanı artıran amillərdəndir. Xüsusilə toy mərasimləri və istirahət mərkəzlərinin açılmasından sonra kütləvi yoluxma və ölüm halları artıb. Yəni, vətəndaşlarda yaranan arxayınlıq, gigiyena və təhlükəsizlik qaydalarına əvvəlki kimi əməl edilməməsi yoluxma dinamikasına təsir etməkdədir. Üstəlik, təmasların sıxlaşması təhlükəli delta ştammının sürətlə yayıldığı bir vaxta təsadüf edir”.
Millət vəkili bildirib ki, hazırda ölkəmizdə virusa yoluxanların 94 faizində delta ştammı aşkarlanıb: “Belə təhlükəli vəziyyətdə vətəndaşların vaksinasiya prosesinə daha fəal cəlb olunması çox vacibdir. Bununla yanaşı qapalı məkanlarda maskadan istifadə, ara məsafənin saxlanması, gigiyenik qaydalara riayət edilməsi zəruridir.
Azərbaycanda vaksin olunanlar arasında cəmi 0,6% yoluxma müşahidə olunur. Vəziyyəti ağırlaşıb süni tənəffüs aparatına qoşulan xəstələrin 97%-i, koronavirusdan vəfat edənlərin 99%-i vaksin olunmayanlardır. Bu göstəricilər vaksinasiyanın indiki şəraitdə yeganə çıxış yolu olduğunu təsdiqləyir”.
Könül Nurullayeva hesab edir ki, hazırda əsas hədəf vaksin olunma faizini 60%-ə qaldırmaqdır: “Bununla pandemiyadan xilas olmaq mümkün olacaq. Bu baxımdan vətəndaşlarımız vaksinasiya prosesində fəal olmalıdır”.

Cavid