• 22 Oktyabr 2020
logo
Ahıllardan ordumuza dəstək mesajları

Ahıllardan ordumuza dəstək mesajları

Bu gün bizim günümüz - Beynəlxalq Ahıllar günüdür. Azərbaycan Prezidenti, Ali Baş Komandan İlham Əliyevin rəhbərliyi ilə Silahlı Qüvvələrimizin ərazilərimizi işğaldan azad etməsi istiqamətində şanlı qələbələri indi bizim bu günü qat-qat artıq sevinc və qürur hissi ilə keçirməyimizə səbəb olub.

Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən verilən xəbərə görə, bunu Ahıllar günü ilə bağlı nazirliyin tabeliyindəki Sosial Xidmətlər Agentliyinin Pensiya yaşına çatmış şəxslər üçün sosial xidmət müəssisəsinin sakinləri ilə keçirilən görüşdə müəssisənin yaşlı sakinləri deyiblər.

Onlar işğal olunmuş ərazilərimizin çox qısa bir zamanda azad ediləcəyi ilə bağlı ölkə başçısının qətiyyətli bəyanatlarından, ordumuzun zəfər yürüşlərindən, düşmənə sarsıdıcı zərbələr vurmasından keçirdikləri sonsuz fəxr hisslərini, iftixar duyğularını bölüşüblər.

“Bu günləri biz həyatımızın ən mənalı, ən sevincli günləri hesab edirik. Azərbaycan əsgərinin rəşadəti bizi o qədər ruhlandırıb ki, qoca, ahıl olmağımıza baxmayaraq, özümüzdə sanki yeni bir güc, qüvvə hiss edirik və hər an ordumuzun sıralarına qoşulmağa, ordumuza bacardığımız qədər köməyimizi, dəstəyimizi göstərməyə hazırıq!”, – deyə müəssisədəki ahıllardan biri bütün sakinlər adından bildirib.

Sosial Xidmətlər Agentliyinin sədri Vüqar Behbudov nazirliyin rəhbərliyinin təbriklərini və xoş arzularını ahıllara çatdırıb. O bildirib ki, ölkəmizdə hər bir ahıl Prezident İlham Əliyevin xüsusi diqqət və qayğısı ilə əhatə olunub. Bu gün ölkədə 420 mindən çox ahıl insan, yəni yaşı 70 və daha yuxarı olan şəxs var. Onların hər biri sosial təminat sistemi ilə əhatə olunub. Pensiyaları, müavinətləri, təqaüdləri ötən dövrdə dəfələrlə artırılıb.

V.Behbudov qeyd edib ki, agentliyin sosial xidmətçiləri tərəfindən evlərində sosial-məişət xidməti göstərilənlərdən 6054 nəfəri məhz tənha ahıl vətəndaşlardır. Pensiya yaşına çatmış şəxslər üçün sosial xidmət müəssisəsində də hazırda 220 nəfər tam dövlət təminatında yaşayır.

Görüşdə müəssisədə yaşayan sakinlərin onlara göstərilən xidmətlərlə bağlı rəyləri, qayğıları öyrənilib, müəssisədə pensiyaçılar üçün mövcud olan şəraitə, göstərilən xidmətlərə baxış keçirilib.