• 29 Noyabr 2021
logo
Baydenin mövqeyi Azərbaycanın siyasi partiyaları tərəfindən hiddətlə qarşılandı

Baydenin mövqeyi Azərbaycanın siyasi partiyaları tərəfindən hiddətlə qarşılandı

Qəribə “reallıqdır”, dünya elə bil erməni saxtakarlığına, erməni həyasızlığına vərdiş edib. Dünyanın bir çox ölkələrində erməni saxtakarlarının yaratdığı miflərin, ağlasığmaz yalanların mahiyyəti ilk baxışdan aydın olsa da, bütün bunları nəinki görməzdən gəlir, hətta bu yalanların təsiri altına düşür, həmmüəllifinə çevrilirlər. Bu günlərdə ABŞ prezidentinin qondarma erməni soyqırımı ilə bağlı ifadə etdiyi saxta iddialar Azərbaycanda fəaliyyət göstərən siyasi partiyaların da hiddətinə səbəb oldu. 48 partiya təmsilçisinin birgə imzaladığı bəyanatda deyilir:

“Tarixi saxtakarlıqlar üzərində qurulmuş erməni dövlətçiliyi bütün dövrlərdə müxtəlif təxribatlara əl atıb. Onilliklər ərzində erməni təbliğat maşını və onun havadarları Osmanlı imperiyasında ermənilərə qarşı soyqırımı törədildiyini sübut etməyə və bütün dünyanı buna inandırmağa cəhd göstərib. Həqiqət isə odur ki, Birinci Dünya müharibəsi zamanı çətin döyüş şəraiti, daxili münaqişələr, aclıq və xəstəliklər üzündən çoxlu sayda erməni həyatını itirib. Lakin məqsədyönlü şəkildə unudulur ki, həmin dövrdə ermənilərdən daha çox türklər həlak olub.

Əgər məqsəd tarixi faktların obyektiv araşdırılmasıdırsa, siyasi məqsədlərə görə tarixi reallıq təhrif edilməməli və iş bu sahədə ixtisaslaşdırılmış beynəlxalq tədqiqat institutlarına, həmçinin tanınmış tarixçilərə həvalə edilməlidir. Türkiyə öz arxivlərini tarixçilərə açmağa hazır olduğunu dəfələrlə bildirib və həqiqəti üzə çıxarmaq naminə birgə komissiyanın yaradılması təklifini irəli sürüb.

Rəsmi İrəvanın məkrli siyasətinin arxasında onlara təzminat ödənilməsi və Türkiyə ərazisinin bir hissəsinin Ermənistana verilməsi kimi cəfəng tələb və iddialar durur. Erməni ədəbiyyatında Türkiyənin şərq əyalətlərinin “Qərbi Ermənistan” adlandırılması da həmin iddiaların rəsmiləşdirilməsinə xidmət edir.

Ermənistanın tarixi faktların saxtalaşdırılması və ekspansiya siyasəti yalnız qardaş Türkiyəyə qarşı deyil, uzun illər ərzində Azərbaycana qarşı da həyata keçirilib.

Təkcə 1918-ci ilin mart soyqırımı zamanı 12 mindən çox türk-müsəlman öldürülüb. Onların çoxunun meyitləri tapılmayıb. XX əsrin digər faciəsi Xocalı soyqırımıdır. 1992-ci il fevralın 26-da Ermənistan hərbi birləşmələri tərəfindən 7 min əhalisi olan Xocalı şəhərində amansız cinayət törədildi. Baş vermiş bu faciələr təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdəndir. Aqressiv erməni siyasətinin bariz təcəssümü olan bu cinayətlərin uzun illərdən bəri öz siyasi-hüquqi qiymətini almaması ikili siyasətin təcəssümüdür.

Son dövrlər qondarma “erməni soyqırımı” iddialarının dünya gündəmində yer almasının səbəbkarı təkcə Ermənistan və erməni lobbisi deyil, həmçinin regionla bağlı imperialist maraqlar güdən qlobal güclərdir. Qondarma “erməni soyqırımı” anlayışı yalnız siyasi təzyiq alətidir və ikili standartlar siyasətinin təzahürüdür. Yaxşı olardı ki, “tarixi həqiqətlər axtarışı”nda olan qüvvələr erməni millətçilərindən Mərkəzi Anadoluda törətdikləri amansız qətllərin hesabını istəyərdilər.

Azərbaycanda fəaliyyət göstərən siyasi partiyalar hər zaman qardaş Türkiyənin yanında olduqlarını bildirir və xəstə erməniçilik idealları bəsləyən ABŞ Prezidentinin qondarma “erməni soyqırımı” məsələsinə dair mövqeyini qətiyyətlə pisləyirlər. Ölkələr və xalqlar arasında dözümsüzlük təlqin edən bu cür yanaşmalar ayrı-ayrı regionların və ümumilikdə bəşəriyyətin dayanıqlı sülhpərvər inkişafına təhdid törədir.”

Əslində özünü, sözünü bilməyən Baydendən bundan artığını gözləməyə də dəyməz. Çünki siyasi karyerası boyu erməni lobbisinin dəstəyilə yüksələn, işğalçıya deyil, işğala, etnik təmizləməyə məruz qalan Azərbaycana qarşı qəbul edilən və Birləşmiş Ştatların ikiüzlü siyasətinin rəmzi olan 907-ci düzəlişin həmmüəllifindən obyektivlik gözləmək sadəlöhvlük olardı. Və onun bu çıxışı heç nəyi dəyişmir və dəyişmək iqtidarnda da deyil. Çünki bu gün Türkiyə dövləti də o zamanların dövləti deyil. Sadəcə Amerika kimi bir dövlətin başçısının tarixi faktlara söykənməyən, xəstə təxəyyülün uydurduğu saxtakarlığa belə utancverici münasibəti yolverilməzdir. Digər tərəfdən, görəsən Bayden saxta, heç bir əsası olmayan soyqırımdan danışdığı halda, erməni vandallarının, müharibə cinayətkarlarının Qarabağda törətdikləri görmək istəmir?

Əfqan Rzayev

Xətai rayon Gənclər və idman idarəsinin rəisi