• 15 Avqust 2022
logo
Beynəlxalq Davamlı Sülh və İnkişaf Fondunun prezidenti və icraçı direktoru Prezident İlham Əliyevi təbrik ediblər

Beynəlxalq Davamlı Sülh və İnkişaf Fondunun prezidenti və icraçı direktoru Prezident İlham Əliyevi təbrik ediblər

Beynəlxalq Davamlı Sülh və İnkişaf Fondunun prezidenti Biserka Yevtimiyeviç və icraçı direktoru Esma Sirbubalodan Azərbaycan Respublikasının Prezidenti İlham Əliyevə təbrik məktubu gəlib.

Məktubda deyilir:

"Zati-aliləri, möhtərəm cənab Prezident.

Beynəlxalq Davamlı Sülh və İnkişaf Fondu (IFSPD) adından Dağlıq Qarabağ regionunda tarixi əhəmiyyət kəsb edən sülhü alqışlayır, Sizə və Azərbaycan xalqına ən səmimi təbriklərimizi çatdırırıq.

Ümidvar olduğumuzu bildiririk ki, atəşkəs haqqında Sizin qürurla imzaladığınız razılaşma Dağlıq Qarabağda sabitlik və firavanlıq erasına gətirib çıxaracaq, regionda və bütün dünyada sülhə, inkişafa və əməkdaşlığa şərait yaradacaq.

Beynəlxalq Davamlı Sülh və İnkişaf Fondu dünyanın qırx ölkəsindən görkəmli ziyalıları, alimləri, ictimai xadimləri, diplomatları və ekspertləri bir araya gətirən beynəlxalq qeyri-hökumət təşkilatı kimi öz fəaliyyətini, ilk növbədə, sülhün təmin edilməsinə, dialoqun, qarşılıqlı anlaşmanın, xalq diplomatiyasının, multikulturalizm dəyərlərinin inkişafına; regional və beynəlxalq təhlükəsizliyə təhdid və təhlükələrin təhlilinə; münaqişələrin qarşısının alınması və nizamlanması üçün beynəlxalq səylərə kömək göstərməyə yönəldib. Bununla əlaqədar Fondumuz Dağlıq Qarabağ mübahisəsinin beynəlxalq hüquqa və BMT Təhlükəsizlik Şurasının Azərbaycanın suverenliyini və ərazı bütövlüyünü, habelə beynəlxalq sərhədlərin toxunulmazlığını təsdiq etmiş qətnamələrinə uyğun şəkildə həll edilməsini ardıcıl olaraq dəstəkləyib.

İnanırıq ki, Sizin qətiyyətli və müdrik rəhbərliyinizlə əldə olunan razılaşma Dağlıq Qarabağ münaqişəsinin uzunmüddətli və tam həlli, eləcə də məcburi köçkünlərin öz dədə-baba torpaqlarına qayıtmaları üçün zəruri şərait yaradacaq.

Zati-aliləri, biz Sizə və bütün azərbaycanlılara bir daha səmimi qəlbdən ölkənizdə və onların evlərində sülhün və firavanlığın bərqərar olmasını arzu edirik.

Zati-aliləri, Sizə ən yüksək ehtiramımızı qəbul edin".