- 19 Aprel 2024
Bakıda qadını qətlə yetirərək zibil qutusuna atan şəxs tutulub.
APA-nın məlumatına görə, ötən gün Nəsimi rayon ərazisində meyiti zibil qutusunda tapılan şəxsin 1989-cu il təvəllüdlü Banu Məmmədova olduğu müəyyən edilib.
Hüquq-mühafizə orqanları tərəfindən aparılan araşdırma zamanı məlum olub ki, B. Məmmədova qayınatası İdris Məhərrəmov tərəfindən qətlə yetirilib.
İ. Məhərrəmov saxlanılaraq istintaqa cəlb edilib.
Baş Prokurorluğun Mətbuat xidmətindən APA-ya bildirilib ki, paytaxtın Nəsimi rayonu ərazisində doğranmış vəziyyətdə naməlum qadın meyitinin hissələrinin aşkar edilməsi faktı ilə bağlı başlanmış cinayət işi üzrə ictimaiyyətə ətraflı məlumat veriləcək.
Qeyd edək ki, ötən gün Nəsimi rayon Prokurorluğun yaydığı məlumatda qeyd olunub ki, yanvarın 27-də saat 01 radələrində Nəsimi rayonu 4-cü mikrorayon, Əlisgəndər İsgəndərov küçəsində məişət tullantılarının atılması üçün nəzərdə tutulmuş zibil qutularında 4 ədəd kisədə və 1 ədəd selofan torbada doğranmış vəziyyətdə naməlum qadın meyitinin hissələrinin aşkar edilməsi barədə rayon prokurorluğuna məlumat daxil olub.
Faktla bağlı Nəsimi rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib.
