• 23 Oktyabr 2020
logo
Özbəkistan iqtisadi sahədə Azərbaycan təcrübəsini öyrənməkdə maraqlıdır

Özbəkistan iqtisadi sahədə Azərbaycan təcrübəsini öyrənməkdə maraqlıdır

İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlının (İİTKM) Özbəkistanın Azərbaycandakı səfiri Baxrom Aşrafxanovla görüşü keçirilib.

İİTKM-dən verilən məlumata görə, görüşdə V. Qasımlı Azərbaycan-Ermənistan təmas xəttində yaşanan gərginlik, Ermənistan ordusunun cəbhə xətti boyunca törətdiyi təxribatlar, eləcə də, yaşayış məntəqələrinə, mülki əhaliyə ağır artilleriyadan açılan atəşlər və Azərbaycan ordusunun əks hücum əməliyyatları barədə məlumat verib. O bildirib ki, Azərbaycan Ali Baş Komandan İlham Əliyevin rəhbərliyi ilə düşmənə adekvat cavab tədbirləri həyata keçirir, Azərbaycan Ordusu öz torpağında Azərbaycanın ərazi bütövlüyünü qoruyur, müdafiə edir.

Öz növbəsində, səfir B. Aşrafxanov qeyd edib ki, Özbəkistan Azərbaycanın ərazi bütövlüyü çərçivəsində, suveren hüquqların qorunması ilə münaqişəsinin sülh yolu ilə həllinin tərəfdarıdır.

Ümumi müzakirə zamanı V. Qasımlı Azərbaycanda həyata keçirilən iqtisadi siyasətin və iqtisadi islahatların yeni idarəetmə çərçivəsi barədə məlumatlar təqdim edib. O həmçinin qeyd edib ki, İqtisadi İslahatların Təhlili və Kommunikasiya Mərkəzinin həyata keçirdiyi “Azexport” portalı, “EnterpriseAzerbaijan” portalı, “Bir Pəncərə” İxraca Dəstək Mərkəzi, eləcə də Rəqəmsal Ticarət Qovşağının fəaliyyəti region, eləcə də dünya ölkələri ilə əlaqələrin inkişafına öz töhfəsini verir.

“Azexport” portalının rəhbəri Ayxan Qədəşov portalın fəaliyyəti barədə məlumat verib. O bildirib ki, Portal Azərbaycanda istehsal olunan malların vahid məlumat bazası olduğu üçün sahibkarlar öz yerli məhsullarını ödənişsiz qaydada bütün dünyada nümayiş etdirə bilirlər. Azexportun fəaliyyət göstərdiyi müddət ərzində Azərbaycan məhsullarının beynəlxalq onlayn ticarət platformalarında mövcudluğu 500 dəfə artıb.

Sonda səfir B. Aşrafxanov bildirib ki, Özbəkistan Azərbaycanda nəqliyyat-logistika, rəqabətqabilliyətli, innovativ ticarət əlaqələrin reallaşmasına dair təcrübənin öyrənilməsində maraqlıdır.

Səfir əlavə edib ki, ölkədə aparılan islahat prosesinin bir nümunəsi kimi “Azexport” portalının və Rəqəmsal Ticarət Qovşağının fəaliyyəti onların diqqətini xüsusi cəlb edib. Məhz bu səbəbdən ölkəsi, Özbəkistanın İnvestisiya və Xarici Ticarət Nazirliyi vasitəsi ilə “Azexport” portalının təcrübəsinin öyrənilməsində maraqlıdırlar.

Müzakirə zamanı həmçinin, İqtisadi İslahatların Təhlili və Kommunikasiya Mərkəzi və Özbəkistan Prezident Administrasiyası nəzdində İqtisadi Tədqiqatlar və İnkişaf Mərkəzi arasında əməkdaşlığın qurulması üzrə Səfirliyin yardımçı olacağı qeyd edilib. Səfir bildirib ki, Özbəkistanın informasiya resursları da Azərbaycanın iqtisadi və innovativ layihələri barədə məlumatlar dərc etməkdə maraqlıdır.